A day of defiance...
A day at the beach....
Galit ang dagat
Bawat hagupit ng alon sa pampang ay sumasabog na matinding poot
Kulang na lang na ito'y magsalita
Sabihing ako'y nalulungkot
Nangungulila sa naglahong kulay at ganda ng dati kong daigdig
Mundong nabili na
Ngunit paulit-ulit pa ring binenta
Hanggang wala nang gustong bumili
Katulad ng perlas na ginawang kwintas
At gomang tirintas na inilalako sa tabing-dagat
Yakap-yakap ng babaing kulot
Ang mayamang matanda na galing sa ibang bansa
Na nagmamasid sa bawat nababasag na alon sa batuhan
Na nagiging tulis-tulis na liwanag
Kaya huwag na tayong lumusong
At sumubok na magpahabol sa alon
Dito na lang tayong magkahawak-kamay sa pampang
Makipagtuksuhan sa mga alaala
Habang dumidilim ang langit
At nagagalit ang dagat
(Puerto Galera, sunset, Oct.15, 2013)
No comments:
Post a Comment